2-апрель — Эл аралык балдар китептеринин күнүнө карата 2025-жылдын 2-апрелинде КР Улуттук жазуучулар союзу менен биргеликте Алыкул Осмонов атындагы КР Улуттук китепканасы балдар үчүн жаңы жарык көргөн китептердин бет ачарын уюштурду.
Иш-чарада Тоголок Молдо сыйлыгынын лауреаты, балдар жазуучусу, көп жылдан бери Улуттук жазуучулар союзунда жооптуу катчы болуп иштеген Жылдыз Акаеванын “Алатай” жомогу жана Кыргыз билим берүү академиясынын Мектепке чейинки жана башталгыч мектептик лабораториясынын ага илимий кызматкери, КР Президентине караштуу Мамлекеттик тил жана тил саясаты комиссиянын алдындагы Кыргыз энциклопедия жана терминология борборунун жетектөөчү илимий кызматкери, балдар жазуучусу Айдай Бекбоеванын “Алтынканат” жомогу окурмандарга сунушталып, чакан көргөзмө уюштурулду.
Иш-чара кенже балдарды мекенчилдикке тарбиялоодо, адеп-ахлакка үгүттөөдө маанилүү болуп саналат жана кыргыз тилин жайылтууга өбөлгө түзүп, кыргыз тилинде жазылган адабияттарды элге кеңири таанытууга багытталган. Ошондой эле жаш окурмандарды кыргызча, сапаттуу көркөм чыгармалар менен тааныштыруу максатын көздөйт.
Бет ачарга Улуттук жазуучулар союзу менен КР Президентине караштуу Мамлекеттик тил жана тил саясаты боюнча улуттук комиссиянын өкүлдөрү, акын-жазуучулар, балдар бакчаларынын жетекчилери, тарбиячылары, массалык маалымат каражаттарынын өкүлдөрү ж.б. катышты.
Иш-чаранын соңунда жазуучулар Улуттук китепкананын жетекчилигине жана эмгек жамаатына ыраазычылык билдиришти.
