2025-жылдын 20-мартында Алыкул Осмонов атындагы Кыргыз Республикасынын Улуттук китепканасында “МАНАС” орденинин кавалери, прозаик, публицист, драматург, журналист, театр жана кино режиссеру, адабиятчы Мар Байжиевдин 90 жылдык юбилейине карата көргөзмө уюштурулду.
Мар Байжиев 1961-жылы “Кара курт” аттуу алгачкы аңгемелер жыйнагы чыккандан кийин бир топ жыл драма жанрында эмгектенди. “Төрт адам”, “Эрөөл”, “Балдар бойго жеткенде”, “Ар бир үйдө майрам” жана башка дагы ондогон драмаларды жаратты. “Кожожаш” эпосунун мотиви боюнча “Байыркы жомок” драмасын жазган. “Эрөөл” пьесасынын сюжетинен эки опера жазылган. “Менин алтын балалыгым” деген чыгармасында жазуучу өзүнүн балалык чагында башынан өткөргөн окуялаларды жазган.
Мар Байжиевдин классикага айланган драмалары дүйнөнүн ири сахналарында коюлган. Сценарийлери боюнча тартылган фильмдер кыргыз кино өнөрүнүн кайталангыс өрнөгү болуп калды. Алсак, “Кыргызфильм” киностудиясында “Ак илбирстин тукумдары”, “Алтын күз”, “Өзбекфильм” киностудиясында “Нөшөр”, “Казактелефильмде” “Жаңы жыл алдындагы түн” аттуу толук метраждуу жана документалдуу фильмдердин сценарийинин автору болгон. Бир катар кыргыз жазуучуларынын чыгармаларын орус тилине которгон. Ошондой эле “МАНАС” эпосун орус тилине которуп даярдоого катышкан. Мар Байжиев орус жана кыргыз тилинде бирдей жаза алган, ал совет адабиятындагы кош тилдүү калемгерлердин бири болгон.
Байжиевдин чыгармалары чет тилдерге да которулуп, өзүнчө китеп болуп басылып чыккан жана 2019-жылы ага КМШ өлкөлөрүнүн “Шериктештик жылдызы” сыйлыгы берилген.
Көргөзмөгө Мар Байжиевдин сүрөттөрү, чыгармалары, китептер жана газета-журналдардан алынган макалалар коюлду.
