2025-жылдын 1-апрелинде Алыкул Осмонов атындагы Кыргыз Республикасынын Улуттук китепканасынын Ч.Айтматов атындагы “Кыргыз китеби” залында көрүнүктүү кыргыз акыны, жазуучу, котормочу жана коомдук ишмер, XX кылымдын экинчи жарымындагы кыргыз поэзиясынын эң жаркын өкүлдөрүнүн бири Жолон Мамытовдун 85 жылдыгына карата “Отту сүйүп оттой жанган акын” аттуу китеп көргөзмө уюштурулду.
Жолон Мамытов 1940-жылы 1-апрелде Ош облусунун Ноокат районунда туулган. Анын “Отту сүйөм”, “Жашыл аалам”, “Убакыт”, “Ырлар”, “Мезгилдин элеси”, “Буруул таңдын жомогу”, “Суунун өмүрү”, “Жарышкан суулар”, “Атка токум салгыла”, “Жүз жашка тол кылым”, “Башат жана Мухит” аттуу поэтикалык жыйнактары басмадан чыгып, адабият күйөрмандарынын алкоосуна татыган. Анын эң белгилүү ыры — Рыспай Абдыкадыров обонун жараткан «Издейм сени» ыры болуп саналат.
Китеп көргөзмөнүн негизги максаты – акындын поэзиясынын терең философиялык ойлорго, мекенге болгон сүйүүгө жана адамзаттык баалуулуктарга бай экендигин, терең көз карашын ачып берүү жана окурмандарды акындын чыгармачылык дүйнөсү менен тааныштыруу.
Көргөзмөгө Жолон Мамытовдун өмүр баянын чагылдырган маалыматтар, томдук китептери, макалалары, чыгармалары коюлду.
